Broadcasted on November 10, 2025 (Monday) on MRT1 at 20.15.
Годишниот извештај на Европската комисија (ЕК) за земјава објавен минатата недела само го потврди она што е општо познато, а тоа е дека државава има проблеми во областите на правосудството и борбата против корупцијата, но можеби првпат подиректно и поконкретно од тоа што е вообичаено, ги лоцира и причините за тоа што нема напредок во оваа сфера. „Целокупната независност и финансиската автономија на судството се поткопани од мешањето и притисокот од другите државни власти, вклучувајќи ги и обидите на парламентот да изврши притисок врз членовите на Судскиот совет да поднесат оставка, како и од ограничените доделени финансиски ресурси“, пишува, меѓу другото, во документот од ЕК. Дали оваа констатација го поместува тежиштето во домашната дебата во која досега доминираше ставот дека главната вина е во судството и јавното обвинителство? Токму извештајот од Брисел е поводот во новото издание на „360 степени“ на МРТ 1 да ја поканиме Мирјана Лазарова-Трајковска, судијка во Врховниот суд. Со неа разговараме и за одговорноста кај судиите и обвинителите за нискиот квалитет на испорачана правда, за подготовката на закони кои треба да придонесат за подобрување на состојбите (а се дел и од Реформската агенда за ЕУ), за процедурата за избор на судија во Европскиот суд за човекови права во Стразбур, а го отвораме и прашањето за т.н. еколошка правда.
Прегледи: 2732
2 коментари
Извонреден гостин, одлично интервју. Како никој до сега судијата ги посочи сите болни точки на судството и ја подотвори вратата на истото да не се гледа со омраза, нетрпеливост и извор на неправда. 35 години бев во таа власт од кои 25 год. првостепен судија и предавач во АСЈО и ги осознав сите слабости во системот, укажував на истите во секоја дадена прилика и не почувствував подготвеност од другите власти да ги преземат чекорите кои им ги даваше Уставот и Законите на судството да му овозможат да го добие местото кое му припаѓа. Мој колега обвинител велеше дека не сме носители на власт туку амали затоа што без разлика на одливот на кадри и приливот на предмети од судиите кои остануваа на функција се бараше само број на решени предмети независно од условите за работа. Во Граѓанскиот суд Скопје се суди и во канцеларии, нема записничари, стручни соработници, административни сужбеници па судите мораат да преземат и дел од нивната работа. Мора да се врати решението само 50% од новоизбраните судии да бидат од Академијата а останатите да бидат правници со положен правосуден/адвокаткси испит со определен број на години поминати во областа на правораздавањето а кои накнадно ќе бидат опфатени со обуки во АСЈО. Акцент треба да се даде на интегритетот на личноста која ќе биде избрана на оваа функција бидејќи стекнувањето на знаења и вештини тече непрекинато цел работен век се' со динамиката на постојаното инапредување на законските решенија кое е нужна константа во секое општество. Не ни требаат луѓе кои не умеат да размислуваат самостојно, аналитички и непристрасно. За да се отстрани секој сомнеж за постоечка корупција треба да се подложи секој избран функционер на детектор на лаги-како за АНБ па, кој подлегнал на притисок-не мора да значи дека примил поткуп, мора да си замине.
Ne slucajno e tamu, vo tie sudski institucii. Odgovorite jasni razbirlivi, bravo.
Коментарите се затворени.